Nakasecure si Governor Darel Dexter T. Uy og ₱138.2-milyon nga ayuda gikan sa nasudnong gobyerno nga ipahinabang sa tanang barangay sa Zamboanga del Norte pinaagi sa mga proyekto sa komunidad ug scholarship program.
Gitunol ang maong pondo atol sa pagbisita ni Presidente Ferdinand “Bongbong” Marcos Jr. sa Zamboanga City niadtong Hunyo 29, 2026.
Ubos sa Socio-Civic Project Fund, matag barangay makadawat og ₱200,000. Ang katunga niini o ₱100,000 igahin alang sa mga prayoridad nga proyekto sa barangay, samtang ang laing ₱100,000 ilaan sa Presidential Scholarship Program. Lima ka kwalipikadong estudyante sa matag barangay ang makadawat og ₱20,000 matag usa isip educational assistance.
Matod ni Gov. Uy, ang maong pondo magpalig-on sa mga proyekto sa barangay ug makatabang sa mga kabatan-onan nga makapadayon sa ilang pag-eskwela. Dugang niya, bunga kini sa panagtinabangay sa lokal ug nasudnong gobyerno aron madala ang mga programa ug serbisyo ngadto sa matag komunidad.
Gipaabot usab ni Presidente Marcos nga prayoridad sa scholarship ang mga graduating college students gikan sa kabus ug near-poor nga pamilya aron matabangan sila sa paghuman sa ilang pagtuon.
Gilauman nga sa pagsugod sa implementasyon sa programa, mas daghang barangay ang makapalambo sa ilang mga proyekto ug mas daghang estudyante ang makabenepisyo sa educational assistance.(IKEN B. GULLEM)
Source: Zamboanga del Norte Provincial News Network