Pormal nga gipasinayaan sa Lokal nga Gobyerno sa Dapitan ug sa Technical Education and Skills Development Authority (TESDA) ang Shrine City Training and Enhancement Center sa Barangay San Pedro niadtong Hunyo 29 aron mapalapdan ang technical-vocational training ug oportunidad sa panginabuhian alang sa mga Dapitanon.
Gipangunahan ni Mayor Evelyn “Belen” T. Uy ang inagurasyon kauban si Vice Mayor Gabriel M. Cad, mga miyembro sa Sangguniang Panlungsod, ug mga opisyal sa TESDA.
Ang maong training center pagadumalahan sa lokal nga gobyerno ug maghatag og dekalidad nga mga programa sa skills training aron maandam ang mga Dapitanon sa trabaho, negosyo ug uban pang panginabuhian.
Mitambong sa kalihokan sila TESDA Acting Executive Director Emely Q. Tesoro, TESDA Zamboanga Peninsula Acting Regional Director Engr. Alan T. Bacatan, ug TESDA Zamboanga del Norte Provincial Director Engr. Adrian B. Ampong, nga mipasalig sa padayon nga suporta sa ahensya pinaagi sa technical assistance, capacity-building ug pondo alang sa operasyon sa maong pasilidad.
Giawhag usab ni Mayor Uy ang mga Dapitanon nga pahimuslan ang mga training nga itanyag sa center aron mapalambo ang ilang kahibalo ug madugangan ang ilang oportunidad sa panginabuhian.(IKEN B. GULLEM)
Source: Dapitan City Government