Pinaagi sa usa ka outreach program, gidala sa Katipunan Municipal Police Station ang edukasyon ug nagkalainlaing serbisyo ngadto sa mga Persons Deprived of Liberty (PDLs) sa Dipolog City Jail-Male Dormitory isip kabahin sa pagsaulog sa ika-31 nga Police Community Relations (PCR) Month.
Ubos sa pagpanguna ni PMAJ Evelyn F. Porras, Acting Chief of Police, ug pinaagi kang PLT Chrissa Mae G. Patriana, Deputy Chief of Police, gipahigayon ang kalihokan sa pakigtambayayong sa MAGPTD Katipunan Chapter nga gipangulohan ni Hon. Ruel Sialon ug ALS Focal Person Jovencia M. Samante, uban sa suporta sa Bureau of Jail Management and Penology (BJMP) nga gipangulohan ni Jail Chief Inspector Jonathan N. Arawangsa.
Atol sa programa, gi-orient ang mga PDL sa kahinungdanon sa edukasyon ug gidasig silang mopadayon sa ilang pagtuon pinaagi sa Alternative Learning System (ALS), nga nagtanyag og oportunidad sa pagpadayon sa pagkat-on bisan pa sa ilang kasamtangang kahimtang.
Human sa orientation, gipanghatagan ang mga ALS learners og school supplies aron masuportahan ang ilang edukasyon. Gipang-apod-apod usab ang food packs ug hygiene kits nga adunay mga batakang personal care items aron mapalambo ang ilang kahinlo, panglawas ug kaayohan.
Sumala sa Katipunan Municipal Police Station, ang maong kalihokan kabahin sa padayon nga paningkamot sa Philippine National Police sa pagpalig-on sa relasyon tali sa kapulisan ug komunidad pinaagi sa mga programang naghatag og paglaom, suporta ug oportunidad sa mga Persons Deprived of Liberty.(IKEN B. GULLEM)
Source: Katipunan Municipal Police Station