Gisugdan ug gitubag na sa Provincial Government of Zamboanga del Norte ang dugay nang problema sa naguba nga Obay-Galas Road Section sa Barangay Obay pinaagi sa pagsemento sa maong dalan ubos sa pagpanguna ni Governor Darel Dexter T. Uy ug sa pagpatuman sa Office of the Provincial Engineer (OPE).
Gipundohan ang Road Improvement Project og ₱6.581 milyon ug naglangkob sa pagsemento sa 290 metros nga dalan nga adunay 6.10 metros nga gilapdon ug 250 milimetros nga gibag-on sa konkreto aron masiguro ang kalig-on ug taas nga serbisyo niini.
Sumala sa OPE, gipabaga ang konkreto isip pagpangandam sa umaabot nga pagpalapad sa dalan paingon sa Dipolog City Port aron mas hapsay ang pagbiyahe sa mga trailer ug winged van cargo trucks padulong sa pantalan.
Dugay nang gireklamo sa mga motorista ug residente ang kahimtang sa maong karsada tungod sa kanunay nga aksidente ug kadaot niini, ilabina sa dapit duol sa M4-Obay Sub-Station sa ZANECO. Usa sa mga nag-unang hinungdan sa pagkaguba sa dalan mao ang pagpundo sa tubig-ulan.
Sa wala pa masugdan ang proyekto, nalangan ang rehabilitasyon tungod sa isyu sa drainage. Aron masulbad kini, naghimo ang OPE og kanal sa kilid sa koral sa ZANECO Sub-Station aron adunay hustong agianan ang tubig-ulan ug malikayan ang pagpundo niini sa karsada.
Gilauman nga pinaagi sa proyekto, mahimong mas luwas ug mas hapsay ang pagbiyahe sa mga motorista samtang mapalig-on usab ang transportasyon ug kalamboan sa ekonomiya sa lalawigan.(IKEN B. GULLEM)
Source: Zamboanga del Norte Provincial News Network