Nadugangan ang kapasidad sa serbisyong panglawas sa Zamboanga del Norte human opisyal nga nadawat sa Provincial Government ang usa ka Patient Transport Vehicle (PTV) gikan sa Philippine Charity Sweepstakes Office (PCSO) niadtong Hunyo 9 sa Dipolog City.
Giturn-over ang maong sakyanan ni PCSO Manager Melquiades A. Robles isip kabahin sa programa sa ahensya aron suportahan ang mga lokal nga panggamhanan sa paghatag og mas paspas ug mas epektibong serbisyong medikal, ilabina sa mga komunidad nga layo ug lisod maabot.
Matud ni Governor Darel Dexter T. Uy, dakong tabang ang dugang nga PTV aron mas mapadali ang pagdala sa mga pasyente ngadto sa mga ospital ug health facilities, labi na kadtong gikan sa mga kabaryohan ug mga lugar nga layo sa sentro sa serbisyo.
Mitambong usab sa turnover ceremony sila si Dipolog City Mayor Roberto Y. Uy, Dapitan City Mayor Evelyn “Belen” T. Uy, Trabaho Party-list Representative Johanne Monich Bautista, PCSO Director Imelda Papin ug uban pang opisyal. Giila sa provincial government nga ang maong PTV maoy usa ka mahinungdanong dugang sa pagpalig-on sa emergency response ug sa Ayuda Medikal Plus program sa lalawigan.(JENIFFER JR. DELICA)
Source: Zamboanga del Norte Provincial News Network