Naghiusa ang Provincial Council for the Protection of Children (PCPC) ug mga kaabag nga sektor sa ika-upat nga quarterly meeting niadtong Disyembre 22 aron repasohon ug palig-onon ang mga lakang sa pagpanalipod ug pag-atiman sa kabataan sa lalawigan sa Zamboanga del Norte.
Gipangunahan ang miting ni Hannah Lou G. Mandantes, Presiding Officer ug Acting Provincial Social Welfare and Development Officer, uban sa mga representante sa nagkalain-laing sektor. Tumong sa kalihokan ang pag-uyon sa mga prayoridad ug pagpalig-on sa koordinasyon sa implementasyon sa mga programa alang sa kabataan.
Gisentro sa diskusyon ang 3-Year Local Development Plan for Children (LDPC) nga gipresentar ni Katrina M. Raneses, Children Welfare Program Focal Person. Ang plano naglatid sa mga estratehiya ug lakang sa sunod tulo ka tuig aron mapalambo ang katungod sa kabataan sa aspeto sa kaluwasan, edukasyon, ug partisipasyon.
Gipresentar usab ang 4th Quarter accomplishment reports subay sa upat ka haligi sa katungod sa kabataan—Survival, Development, Protection, ug Participation, nga nagpakita sa mga nahimo sa probinsya alang sa kabataan.
Gipadayag sa konseho ang padayon nga suporta ni Governor Darel Dexter T. Uy sa mga inisyatiba sa PCPC ug sa pagpatuman sa LDPC, nga nagpakita sa lig-on nga baruganan sa probinsyal nga pangagamhanan sa pagpanalipod sa katungod ug kaayohan sa kabataan.(IKEN B. GULLEM)
Source: Zamboanga del Norte Provincial News Network