Mas napaduol ang serbisyong panglawas ngadto sa mga coconut farmers ug ilang pamilya human gilunsad sa Philippine Coconut Authority (PCA) ang “Bayaniyugan sa Kalusugan” Mobile Health Services Program sa lungsod sa Sibuco.
Ang maong programa kabahin sa Coconut Farmers and Industry Development Plan nga nagtumong sa paghatag og accessible nga healthcare services ngadto sa mga komunidad nga nagsalig sa industriya sa niyog.
Mitambong sa launching si Cong. Adrian Ian Amatong kinsa mipasalamat kang PCA Chief Executive Officer Administrator Dexter Buted tungod sa pagdala sa programa ngadto sa ika-tulong distrito sa Zamboanga del Norte.
Sumala kang Cong. Amatong, dako og kahulugan ang maong inisyatiba alang sa probinsya ilabina nga usa ang Zamboanga del Norte sa adunay pinakadakong coconut area sa nasud. Gipasabot usab niya nga ang Sibuco maoy unang destinasyon sa serye sa medical outreach missions sa PCA.
Mitambong usab sa kalihokan sila Board Member Leo Nicanor Mejorada, Provincial IPMR Lajamuddin Jailani isip representante ni Gov. Darel Uy, PCA ZN Manager Elpedio Espiritu Jr., ug mga opisyal sa Sibuco lakip si Mayor Joel Ventura ug Vice Mayor Absar Caril.
Pinaagi sa maong outreach program, gilauman nga mas daghang coconut farmers ang makadawat og serbisyong medikal ug suporta gikan sa gobyerno.(KEN B. GULLEM)
Source: Team Adrian Amatong