Gidayeg ni Dapitan City Mayor Evelyn “Belen” Uy ang determinasyon, disiplina ug talento sa mga kabatan-onan atol sa Culmination Day sa Batang Dasig Free Sports and Arts Summer Camp 2026 nga gipahigayon sa Dapitan City National High School.
Gipasiugda sa mayor nga ang maong kalihokan dili lamang panapos sa summer camp kondili pagsaulog usab sa mga kahanas, leksyon ug positibong kinaiya nga naugmad sa mga partisipante sulod sa milabay nga mga semana.
Matud ni Mayor Uy, ang programa nakatabang sa mga kabataan sa pagkat-on sa pagtinabangay, pagdisiplina sa kaugalingon, pagbangon gikan sa kapakyasan ug pagpalambo sa ilang talento sa sports ug arts.
Nagpasalamat usab siya sa mga ginikanan, coaches ug facilitators sa ilang suporta sa mga partisipante, samtang giawhag ang mga kabataan nga ipadayon ang pagtuo sa ilang kaugalingong abilidad ug pagpaningkamot aron matuman ang ilang mga damgo.(JENIFFER JR. DELICA)
Source: Zamboanga del Norte Provincial News Network