Aron mapalambo ang kahibalo sa komunidad bahin sa hustong nutrisyon ug himsog nga panginabuhi, gipahigayon usab sa Barangay Estaka ang selebrasyon sa ika-52 nga Nutrition Month niadtong Hulyo 8 sa Estaka Covered Court, sa pakigtambayayong sa City Government of Dipolog.
Gipangulohan ni Punong Barangay Irvin A. Banga ang maong kalihokan uban sa City Nutrition Division nga gipangulohan ni City Nutrition Action Officer Riza Jane B. Zamoras.
Mitambong usab sa selebrasyon si City Councilor James Cyril Ruiz, Assistant City Social Welfare and Development Officer Jovencia D. Gregory, ug si Renato Velasco sa City Disaster Risk Reduction and Management Office, isip kabahin sa suporta sa lokal nga panggamhanan sa mga programa sa nutrisyon.
Kini nga kalihokan kabahin sa padayon nga paningkamot sa siyudad sa pagpalig-on sa mga community-based nutrition programs ug pagdasig sa matag Dipolognon sa pagpraktis sa himsog nga estilo sa kinabuhi.(IKEN B. GULLEM)
Source: Dipolog City Government