Gisugdan na sa mga opisyal ug stakeholders ang pagpangandam alang sa 2027 Zamboanga Peninsula Regional Athletic Association o ZPRAA Meet nga pagahostan sa Probinsya sa Zamboanga del Norte uban sa mga Dakbayan sa Dipolog ug Dapitan. Gipahigayon ang Planning and Coordination Meeting sa ZANDIDAA Delegation sa Provincial Capitol sa Dipolog City.
Gitambongan ang panagtigom sa mga opisyal sa Department of Education, regional ug division sports officers, tournament directors, ug mga miyembro sa nagkalain-laing working committees aron hisgutan ang mga kinahanglanong pagpangandam alang sa maong regional sports event.
Lakip sa gihisgutan ang kahandaan sa mga playing venue ug mga eskwelahang gamiton isip billeting area, mga responsibilidad sa regional ug local working committees, ingon man ang organisasyonal ug operasyonal nga mga plano alang sa maong kompetisyon.
Tumong sa maong koordinasyon ang pagsiguro nga mahimong hapsay ug malampuson ang pagdumala sa 2027 ZPRAA Meet nga pagatambongan sa mga atleta gikan sa tibuok Zamboanga Peninsula.(JENIFFER JR. DELICA)
Source: DepEd Tayo- Division of Dapitan City