Gipahigayon sa Philippine Coconut Authority o PCA ang Bayaniyugan sa Kalusugan Mobile Health Services Program sa Barangay Sarawagan, Godod, Zamboanga del Norte aron maduol ang serbisyong panglawas sa mga mag-uuma sa lubi ug ilang mga pamilya. Mitambong sa kalihokan si Third District Representative Adrian “Ian” Amatong.
Kabahin ang programa sa Coconut Farmers and Industry Development Plan nga nagtumong sa pagdala sa batakang serbisyong medikal bisan sa mga hilit nga komunidad aron mas daghang mag-uuma ang makaangkon og maayong pag-atiman sa panglawas.
Sa iyang mensahe, giawhag ni Cong. Amatong ang katawhan nga suportahan ug pahimuslan ang mga programa sa gobyerno nga gitumong sa pagpauswag sa ilang panginabuhi. Miingon usab siya nga magpadayon ang paningkamot sa gobyerno sa paghatag og serbisyo bisan dili matubag dayon ang tanang panginahanglan.
Mitambong usab sa kalihokan sila Godod Mayor Richie Uy, Sarawagan Barangay Captain Antonia Zamoras, PCA Zamboanga del Norte Manager Elpedio Espiritu Jr., ug ubang mga opisyal sa PCA.(JENIFFER JR. DELICA)
Source: Team Adrian Amatong