Gipasiugda sa DENR Regional Office IX ang kolektibong papel sa matag Pilipino sa pagpanalipod sa Philippine Eagle atol sa pagsaulog sa Philippine Eagle Week 2026.
Pinaagi sa tema nga “Lahat Kasali, Lahat May Papel: Sama-Sama para sa Philippine Eagle,” gihatagan og gibug-aton ang kamahinungdanon sa panaghiusa sa gobyerno, pribadong sektor, ug komunidad aron mapreserbar ang nasudnong langgam ug ang mga kalasangan nga maoy pinuy-anan niini.
Sumala sa DENR-9, ang pagpanalipod sa Philippine Eagle adunay dakong papel sa pagmintinar sa balanse sa ekosistema ug sa pagpreserbar sa biodiversity sa nasud. Giawhag usab ang publiko sa pag-apil sa mga inisyatiba nga nagtumong sa pag-atiman sa kinaiyahan ug sa mga habitat sa mga ilahas nga mananap.
Pinaagi sa maong selebrasyon, gipalig-on ang kahibalo sa publiko bahin sa konserbasyon ug sa responsibilidad sa matag usa sa pagpanalipod sa umaabot sa Philippine Eagle.(IKEN B. GULLEM)
Source: DENR IX Zamboanga Peninsula