Gihimong entablado sa pagpasidungog sa kultura ug panaghiusa ang ZaNorte Inter-LGU Cultural Dance Competition diin 15 ka mga lungsod sa Zamboanga del Norte nagpakitang-gilas sa ilang mga pasundayag atol sa Saulog 2026 niadtong Hunyo 4 sa Dipolog Boulevard.
Nagkadaiyang mga istorya sa kagikan, tradisyon, ug pag-uswag sa mga komunidad ang gipaabot pinaagi sa sayaw. Sentro sa mga presentasyon ang kontribusyon sa mga Subanen, Muslim, ug Kristiyano nga nagkahiusa sa paghulma sa identidad ug kabilin sa probinsya.
Pinaagi sa mga mabulukong kostyum, tradisyonal nga musika, ug mamugnaong koreograpiya, gipakita sa mga partisipante ang importansya sa pagpreserbar sa kultura samtang gipalig-on ang pagbati sa panaghiusa tali sa nagkalain-laing komunidad.
Sa pagtapos sa kompetisyon, nakuha sa Godod ang kampyonato human sa impresibong pagpasundayag sa ilang kultura ug kasaysayan. Gisundan kini sa Salug isip First Runner-Up ug Sindangan isip Second Runner-Up.(IKEN B. GULLEM)
Source: Department of Tourism- Zamboanga Peninsula Office