Nagpalig-on sa ilang panag-uban ang Bureau of Fire Protection (BFP)-Zamboanga del Norte ug DepEd Dapitan City pinaagi sa pagpirma og Memorandum of Agreement (MOA) alang sa kaluwasan ug disaster preparedness sa mga eskwelahan nga nahimutang sa layo nga mga isla.
Gihimo ang ceremonial signing niadtong Mayo 29, 2026 sa SDO Conference Hall uban ni BFP Acting Fire Marshal PSUPT Richard C. Timosa, FSC ug DepEd Schools Division Superintendent Jay S. Montealto, CESO V nga girepresentahan ni SGOD Chief Sherlito E. Sagapsapan.
Kabahin sa maong kasabutan ang paghatag sa BFP og fire extinguishers ug school supplies ngadto sa Selinog Integrated School aron mas mapalig-on ang kahandam sa mga estudyante ug magtutudlo panahon sa emerhensya.
Gipunting sa maong programa ang mga eskwelahan sa Geographically Isolated and Disadvantaged Areas (GIDA) sama sa Selinog Island nga adunay limitadong access sa emergency response ug rescue services.
Matud sa mga opisyales, dako og tabang ang paghatag og fire safety equipment ug disaster preparedness training aron mapanalipdan ang mga kabataan ug komunidad batok sa posible nga mga sunog ug uban pang kalamidad.
Pinaagi sa partnership tali sa BFP ug DepEd, gilauman nga mas mapalambo pa ang culture of safety ug preparedness sa mga eskwelahan sa Dapitan City, ilabi na sa mga lugar nga lisod maabot panahon sa emerhensya.(IKEN B. GULLEM)
Source: DepEd Tayo-Division of Dapitan