Gipalapdan pag-usab sa Task Force Alambre ang ilang kampanya alang sa limpyo ug luwas nga karsada pinaagi sa cable clearing operation nga gihimo sa Barangay Sta. Isabel, Dipolog City niadtong Mayo 29.
Ang clearing activity gipangulohan sa Office of the Building Official ug nakapokus sa bahin sa Corner Father Patangan Road hangtod sa Bypass Road diin daghang nagbitay ug wala na magamit nga mga kable ang gitangtang.
Base sa mga otoridad, ang nagkalaw-it nga mga linya mahimong peligro sa publiko ilabi na panahon sa kusog nga ulan ug hangin, maong gipadayon ang operasyon aron malikayan ang posibleng aksidente ug sagabal sa dalan.
Gawas sa aspeto sa kaluwasan, kabahin usab sa tumong sa programa ang pagmintinar sa kahapsay ug organisadong dagway sa syudad pinaagi sa paglimpyo sa mga poste ug dalan gikan sa nagkasagol nga utility cables.
Padayon usab nga gina-monitor sa Task Force Alambre ang ubang lugar sa Dipolog City aron maapil sa sunod nga clearing operations.(IKEN B. GULLEM)
Source: Dipolog City Government