Nakadawat og dugang nga suporta ang mga asosasyon sa Zamboanga del Norte pinaagi sa Peace and Development Buong Bansa Mapayapa (PDBBM) Program sa Department of Social Welfare and Development (DSWD), nga nagpadayon sa pagpalig-on sa panginabuhian ug kalamboan sa mga komunidad sa probinsya.
Pinaagi sa PAMANA Livelihood Program ubos sa PDBBM, lima ka mga asosasyon sa Dakbayan sa Dipolog ug duha sa lungsod sa Liloy ang nakadawat og livelihood assistance atol sa ceremonial turnover nga gipahigayon gikan Hunyo 2 hangtod 4, 2026.
Kini nga tabang gitumong sa pagpalambo sa ilang mga panginabuhian, pagdugang sa produktibidad, ug pagmugna og dugang nga tinubdan sa kita alang sa mga miyembro sa matag asosasyon.
Gihatagan usab og Certificates of Accreditation ang pipila ka mga beneficiary associations isip pag-ila sa ilang kahandam ug kapasidad sa pagdumala sa mga proyekto sa panginabuhian.
Sumala sa DSWD-PDBBM, ang maong inisyatiba kabahin sa mas lapad nga paningkamot sa pagpalambo sa kalinaw, kalig-on sa ekonomiya, ug inklusibong kalamboan sa mga komunidad sa Zamboanga del Norte ug sa tibuok Zamboanga Peninsula.(IKEN B. GULLEM)
Source: DSWD Field Office IX Zamboanga Peninsula