Naghiusa ang 828 ka mga boluntaryo gikan sa nagkadaiyang sektor sa Zamboanga Peninsula sa usa ka dunganang trail plogging activity niadtong Hunyo 5 isip pag-obserbar sa World Environment Day 2026.
Pinaagi sa kalihokan nga gipangulohan sa DENR Region IX ubos sa temang “Aksyon, Klima: Bayaning Mapagkalinga sa Kapaligiran,” nakatigom ang mga partisipante og 698 ka kilo nga basura gikan sa mga dalan, baybayon, agianan, ug pampublikong lugar sa rehiyon.
Sa Zamboanga del Norte, gipahigayon ang mga clean-up activities sa Dipolog Boulevard sa Barangays Central ug Miputak, New Road sa Barangay Manaol sa Siocon, Campsite area sa Barangay Fatima sa Liloy, Palaranan sa Manukan, ug Barangay Talisay sa Dakbayan sa Dapitan. Nagtumong kini sa pagpalig-on sa kahibalo sa publiko bahin sa hustong pagdumala sa basura ug pag-atiman sa kinaiyahan.
Miapil sa maong inisyatiba ang mga representante gikan sa lokal ug nasyonal nga mga ahensya sa gobyerno, barangay officials, akademya, pribadong sektor, uniformed personnel, mga benepisyaryo sa TUPAD ug 4Ps, ingon man mga organisasyon nga nagpaluyo sa kalihokan.
Kini nga paningkamot nagpakita sa nagkahiusang responsibilidad sa komunidad sa pagpanalipod sa kinaiyahan ug pagpreserbar sa natural nga kahinguhaan alang sa umaabot nga mga henerasyon.(IKEN B. GULLEM)
Source: DENR Zamboanga Peninsula