Nasakpan sa mga otoridad ang usa ka 56-anyos nga babaye atol sa buy-bust operation nga gipahigayon sa Don Jose Aguirre, Manukan, Zamboanga del Norte, human kini gituohang nagbaligya og ilegal nga droga.
Giila ang suspetsado nga si alyas “Flora” balo, negosyante, ug residente sa Barangay Galas, Dipolog City.
Sa operasyon, narekober gikan sa iyang posesyon ang upat ka gagmayng sachet nga adunay gituohang shabu ug ang buy-bust money nga gigamit sa mga operatiba.
Samtang, gidala ang suspetsado sa kustodiya sa Manukan Municipal Police Station ug giandam ang kasong paglapas sa Republic Act No. 9165 o ang Comprehensive Dangerous Drugs Act of 2002.
Ang mga nakuhang ebidensya ipadala usab alang sa hustong eksaminasyon ug dokumentasyon.(IKEN B. GULLEM)
Source: Chicken State News Philippines