Giplanohan na karon ang pagtukod sa bag-ong Tourist Rest Area nga pasilidad alang sa mga biyahero sa Labason isip pag padayon sa pagpalambo sa sektor sa turismo sa Lungsod human gisusi sa mga opisyal sa Tourism Infrastructure and Enterprise Zone Authority (TIEZA) ang lugar nga gitakdang tukoran sa nasangpit nga pasilidad niadtong Septiyembre 4,2026.
Kabahin kini sa preparasyon alang sa implementasyon sa aprobahan nang proyekto nga gipatuman pinaagi sa pakigtambayayong sa Department of Tourism (DOT) ug TIEZA. Tumong sa pasilidad nga mahatagan ang mga biyahero og hapsay, luwas ug komportableng dapit diin sila mahimong mopahulay atol sa ilang pagbiyahe.
Sa gihimong site inspection, gisusi sa TIEZA team ang kahimtang ug kaangayan sa lugar alang sa proyekto diin gipangulohan ang assessment nila ni Engr. Jeffrey P. Hernandez, Architect Princessree Malabay, ug Architect Shine S. Castro gikan sa TIEZA-PEPD, uban si Wenceslao Z. Galeza, representante sa DOT Region IX.
Mitambong usab sa site assessment si Hermon V. Abaya, Tourism Officer Designate sa Labason, kauban ang mga kawani sa Municipal Tourism Office ug Municipal Engineering Office alang sa koordinasyon ug teknikal nga mga diskusyon.
Gilauman nga ang TRA mahimong dugang nga suporta sa mga bisita pinaagi sa mga pasilidad nga maghatag og kaharuhay, impormasyon kabahin sa lokal nga turismo ug uban pang serbisyo nga makatabang sa mga manlalakaw.
Dugang pa, gilauman nga ang proyekto makatampo sa pag-uswag sa turismo sa Labason, pagpalapad sa mga oportunidad sa lokal nga ekonomiya, ug pagpaila sa natural nga katahom, kultura ug pagkamaabiabihon sa mga lumulupyo.
Ang maong proyekto nagtimaan sa laing lakang sa Labason padulong sa pag-establisar sa mas organisado, accessible ug visitor-friendly nga destinasyon sa turismo sa Zamboanga del Norte.(MEDALYN U. BORJA)
Source: Labason Municipal Tourism