Sa pagsugod sa road concreting project sa Purok 2, Barangay Mabuhay, Rizal, Zamboanga del Norte, gilauman nga mas mapauswag ang akses sa transportasyon ug masiguro ang mas luwas nga pagbiyahe alang sa mga lumulupyo sa maong komunidad.
Gisugdan ang proyekto pinaagi sa groundbreaking ceremony nga gipangunahan ni Punong Barangay Gilgen Rose uban sa mga miyembro sa Sangguniang Barangay. Mitambong usab sila Municipal Mayor Marissa Manigsaca, Municipal Vice Mayor Jose B. Salac, DILG Provincial Director Mario A. Baterna, ug mga miyembro sa Sangguniang Bayan isip pagpakita sa ilang suporta sa maong inisyatiba.
Ang road concreting project gipondohan ubos sa Local Government Support Fund–Growth Equity Fund (LGSF-GEF) ug ipatuman sa Barangay Government of Mabuhay.
Samtang, kabahin kini sa padayon nga paningkamot sa barangay, municipal ug nasyonal nga panggamhanan sa pagpatuman og mga imprastraktura nga makatampo sa dugayng kalamboan sa lungsod sa Rizal.(IKEN B. GULLEM)
Source: Municipality of Rizal