Gipahigayon ang orientation alang sa 50 ka benepisyaryo sa Tulong Panghanapbuhay sa Ating Disadvantaged/Displaced Workers (TUPAD) sa Government Center Lobby sa Dapitan City isip pagpangandam sa ilang 45-adlaw nga emergency employment ubos sa Department of Labor and Employment (DOLE).
Atol sa orientation, gipasabot sa DOLE TUPAD Coordinator ang mga giya sa programa, mga buluhaton nga pagabuhaton, ug mga polisiya nga sundon sa mga benepisyaryo sa dili pa sila i-deploy sa ilang tagsa-tagsang community-based projects.
Sa pagsugod sa programa, makadawat ang matag benepisyaryo og adlawang suhol nga ₱464 sulod sa 45 ka adlaw, nga gilaumang makatabang sa ilang panginabuhian.
Ang maong ayuda sa panginabuhian nahimong posible pinaagi sa panagtambayayong sa First District Congressional Office ug sa Local Government Unit sa Dapitan, nga nagtumong sa paghatag og temporaryong trabaho sa mga disadvantaged ug displaced workers sa nagkalain-laing barangay.
Kabahin ang TUPAD nga programa sa DOLE nga naghatag og temporaryong trabaho sa mga kwalipikadong benepisyaryo samtang nagpatuman sila og mga proyekto nga mapuslanon sa ilang komunidad.(IKEN B. GULLEM)
Source: Dapitan City Government