Isip pagsaulog sa World Kidney Day karong adlawa, nagpahinumdum ang mga kadagkuan sa Department of Health nga ampingan ang panglawas ilabi na ang kidneys. Kini base sa gihimong adbokasiya sa maong buhatan dinhi sa Mibang Hotel, Marso 11 nga gitambungan ni Dri Eduardo Luwayon, OIC sa Provincial Health Office.
Sa pagpakighinabi ni Ms. Aubrey P. San Luis DOH 9 Chronic Kidney Disease Program Coordinator nga ang pagsaulog sa World Kidney Day matag ikaduha nga semana sa bulan sa Marso matag tuig ug nagpahinumdum unsa ka importante ang kidneys ug unsa kini ka kamahinungdanon isip lakip sa body organ nga adunay dakong papel nga himsug ang panglawas.
Dugang ni Ms. Aubrey nga ampingan ang kidney aron malikayan ang Chronic Kidney Disease pinaagi sa regular nga pagpakonsulta, ginadili ang pagpanigarilyo ug pag-inum sa ilmnong makahubog. Kinahanglan usab ang regular nga pag-ehersisyo ug dili angayan manubra ang timbang kay mao kini ang usa sa risk factor nga makasinati sa Chronic Kidney Disease.
Ingon man, kinahanglan usab mosagup sa low salt diet ug adequate hydration o ang insaktong pag-inum ug tubig. Nasayran nga ang World Kidney Day karong tuiga nagdala sa tema “Detect Early, Protect Kidney Health”. (Angelica T. Obina)
(Source: PIC-Sheng Jumalon Bala)