Ang Central Visayas nagpabiling pinakapaspas nga nag-uswag nga rehiyon sa Pilipinas niadtong 2023, base sa report sa National Economic and Development Authority (NEDA-7) nga gipresentar atol sa Regional Development Council (RDC) meeting sa Cebu Provincial Capitol, sa nakakabay na adlaw.
Sa report ni Architect Neil Andrew Menjares, hepe sa Policy Formulation and Planning Division sa NEDA-7, mipakita nga mitubo og 7.3% ang ekonomiya sa rehiyon – ang pinakataas nga growth rate sa tibuok nasod. Kini nakapadangat sa P1.381 trilyon nga kantidad sa rehiyon sa 2023, gikan sa P1.29 trilyon sa 2022, nga nagpahimo niini nga ika-upat nga pinakadakong ekonomiya sa Pilipinas.
Apan, tungod sa bag-ong balaod sa paghimo sa Negros Island Region (NIR), ang Central Visayas mamahimong gilangkuban na lang sa Cebu ug Bohol, samtang ang Negros Oriental ug Siquijor moapil na sa bag-ong rehiyon. Tungod niini, gibanabanang mawagtang ang P179 bilyon o 14% sa rehiyonal nga GDP tungod sa pagkawala sa kontribusyon sa Negros Oriental ug Siquijor.
Bisan pa sa maong kabag-ohan, nagpabilin nga lig-on ang ekonomiya sa bag-ong Central Visayas, nga gibanabana nga P1.2 trilyon ang kantidad. Base sa datos, mao kini ang nag unang mga kontribyutor sa ekonomiya sa rehiyon: Cebu Province – 30.1%, Cebu City – 22.4%, Bohol Province – 13.3%, Lapu-Lapu City – 11.8% , ug Mandaue City – 8.5%.
Nagpabilin nga dako ang papel sa Central Visayas sa ekonomiya sa Pilipinas, bisan pa sa pag-usab sa komposisyon niini tungod sa pagbalhin sa duha ka probinsya sa bag-ong rehiyon. (Renante Socia Lada)
(Source: Cebu Provincial PIO)