Andam na ang Department of Health (DOH) Zamboanga Peninsula Center for Health Development uban sa mga Local Government Units (LGUs) sa pagpatuman sa Measles-Rubella Supplemental Immunization Activity (MR-SIA) sa tibuok rehiyon sugod Enero 19 hangtod Pebrero 13, 2026.
Ang kampanya nagpunting sa proteksyon sa mga bata nga edad 6 hangtod 59 ka bulan batok sa tigdas ug rubella, nga kasagaran magdala og komplikasyon kung dili mabantayan. Gi-emphasize sa DOH nga ang bakuna libre, luwas, ug epektibo, nga gigamit na sa Pilipinas sulod sa kapin 50 ka tuig.
Kaniadtong adlaw, nagpahigayon ang DOH Region IX og Virtual Town Hall Meeting aron ipahibalo sa mga LGU ug barangay ang detalye sa kampanya. Gipatin-aw ang proseso sa paghatag sa MR dose, lakip ang duha ka semana nga aktibong kampanya ug usa ka semana nga mop-up alang sa mga batang wala mabakunahan.
Gipahibalo usab sa DOH nga ang mga vaccination sites, fixed man o temporary, ibutang sa mga komunidad aron sayon ma-access sa mga ginikanan.
Ang DOH nagpadayon sa pagpalambo sa komunikasyon aron masabtan sa publiko nga ang bakuna dili lang proteksyon sa bata kundi proteksyon sa tibuok komunidad.(IKEN B. GULLEM)
Source: Zamboanga del Norte Provincial News Network