Opisyal nang gipasirhan sa Department of Environment and Natural Resources (DENR) Region 7 ang landfill sa Barangay Binaliw human sa makalilisang nga trahedya niadtong Enero 8 nga mikalas og daghang kinabuhi, samtang dul-an 30 pa ka tawo ang wala pa makit-i.
Matod sa DENR, gihimo ang pagsirado human sa usa ka komprehensibo, patas, ug base sa ebidensya nga imbestigasyon aron masuta ang tinuod nga hinungdan sa pagdahili sa basura, mailhan ang mga responsable, ug makahatag og angay nga rekomendasyon aron malikayan ang parehas nga insidente sa umaabot.
Sa site inspection niadtong Enero 9, nasuta sa Environmental Management Bureau (EMB) Region 7 technical team nga adunay seryosong risgo ug hulga sa kinaiyahan ug kaluwasan sa katawhan ang padayon nga operasyon sa pasilidad.
Tungod niini, gi-isyu sa DENR ang Cease-and-Desist Order (CDO) batok sa Prime Integrated Waste Solutions, Inc. (PIWSI) subay sa EMB Memorandum Circular 2007-002, nga nagtugot sa EMB Regional Director sa daling pagsuspenso sa operasyon kung adunay grabe nga kadaot o hulga sa kinaiyahan ug kinabuhi sa tawo.
Source: DENR-7
I via Renante Socia Lada