Gipahugtan sa Probinsyal nga Pangagamhanan sa Zamboanga del Norte ang pagpatuman sa Ease of Doing Business Act nga maoy sentro sa gipahigayong miting, nga gitawag aron tapuson ang dugay ug libog nga mga transaksiyon sa gobyerno, didto sa Ground Floor Plenary Hall sa Zamboanga del Norte Convention and Exhibition Center.
Gipangunahan ni Provincial Administrator Charmie Yu, kauban si Provincial Internal Audit Officer Jill Fabrero, ang panagtigom sa mga hepe sa probinsyal nga mga opisina ug ospital
Sentro sa panaghisgot ang pagpatuman sa Republic Act 11032 o ang Ease of Doing Business and Efficient Government Service Act of 2018, nga nagpalig-on sa RA 9485 o Anti-Red Tape Act, kini nag tumong nga pasayonon ug papaspason ang paghatag og serbisyo sa gobyerno alang sa kaayohan sa katawhan.
Nahisgutan usab ang Citizen’s Charter, lakip ang klarong lakang sa proseso, eksaktong oras sa pagproseso, ug kompletong listahan sa dokumento, aron malikayan ang balik-balik nga lakaw sa mga kliyente.
Ang lakang kabahin sa direktiba ni Gobernador Darel Dexter Uy nga himuon nga mas paspas, mas tin-aw, ug mas makatawhanon ang serbisyo sa probinsya.(IKEN B. GULLEM)
Source: Zamboanga del Norte Provincial News Network