Human sa dugay nga paghulat, gilauman nang masugdan ang pagtukod sa bag-ong Quezon Bridge sa Dipolog City kasunod sa padayon nga koordinasyon sa Department of Public Works and Highways (DPWH) ug sa mga opisyal nga nagpalihok sa proyekto.
Sa miting uban ni DPWH Secretary Vince Dizon, gihisgutan ni 2nd District Representative Irene Labadlabad ug kanhi mayor ug kongresista Rosendo “Dodoy” Labadlabad ang mga lakang aron mapadali ang implementasyon sa proyekto nga dugay nang gipangayo sa mga residente ug mga motorista.
Ang Quezon Bridge maoy usa sa labing importante nga agianan sa siyudad tungod kay nagkonekta kini sa sentro sa Dipolog ngadto sa ubang mga barangay, Dapitan City, ug kasikbit nga mga lungsod. Sulod sa pipila ka bulan, sirado kini sa mga sakyanan human giila nga delikado nang agian.
Gilauman nga ang bag-ong tulay makapauswag sa kaluwasan sa mga biyahero ug makapahapsay sa dagan sa trapiko sa maong ruta.
Sumala sa mga Labadlabad, padayon ang koordinasyon tali sa lokal nga panggamhanan ug sa DPWH aron masiguro nga masugdan ug mapadayon ang proyekto sa labing dali nga panahon, isip usa sa mga prayoridad nga imprastraktura sa Dipolog City ug Zamboanga del Norte.(IKEN B. GULLEM)
Source: Zanorte News Flash