Gipasiugda ni Zamboanga del Norte Governor Darel Dexter Uy ang importansya sa pagpreserbar sa kasaysayan, kultura ug panulondon sa lalawigan atol sa paggunita sa ika-130 anibersaryo sa pagbiya ni Dr. Jose P. Rizal gikan sa Dapitan human sa upat ka tuig nga pagpabilin isip destiyero.
Sa iyang Facebook post, matod ni Gov. Uy nga ang paghinumdom sa mga mahinungdanong hitabo sa kasaysayan makatabang sa pagpalawom sa kahibalo sa kabatan-onan ug sa publiko bahin sa kinabuhi, mga prinsipyo ug bililhong panulondon ni Rizal. Matud pa niya, pinaagi sa pag-atiman sa kasaysayan mas mapalig-on ang pagkaila sa mga Pilipino ug ang ilang gugma sa nasud.
Gipasalamatan usab sa gobernador ang Dapitan City Government ubos sa pagpanguna ni Mayor Evelyn T. Uy, Vice Mayor Gabriel M. Cad ug sa Sangguniang Panlungsod alang sa malampusong pagdumala sa maong paggunita niadtong Hulyo 31 sa NHCP Museo ni Jose Rizal sa Dapitan. Giila usab niya ang National Historical Commission of the Philippines (NHCP), Department of Education (DepEd), ug uban pang kaabag sa kalihokan.
Gipadayag usab ni Uy ang padayon nga suporta sa Provincial Government sa mga programa ug inisyatibo nga nagpreserbar sa kasaysayan, kultura ug panulondon alang sa umaabot nga mga henerasyon.(IKEN B. GULLEM)
Source: Gov Darel Uy