Nahimong malamposon ang paglusad sa “BUHAY INGATAN, DROGA’Y AYAWAN” BIDA Program dinhi sa dakbayan adlaw’ng Sabado, Disyembre 10, 2022, sa Museo Dipolog, ning siyudad.
Ang kalihokan gipangunahan sa kagamhanang lokal sa dakbayan uban sa koordinasyon sa lokal nga buhatan sa Department of the Interior and Local Government, pinaagi ni City Local Government Operations Officer, Sherrie Charlota N. Machutes.
Duyog sa partisipasyon sa mga personahe gikan sa Dipolog City Police Station sa pagpanguna mismo ni OIC-Chief of Police, Lt. Col. Vedasto J. Dasmarinas, uban sa pipila ka mga opisyal ug indibidwal gikan sa lima ka mga district barangays ning atong siyudad, nahimong masadya ang pagpahigayon sa maong kalihokan.
Sa hamubong programa, gisugdan kini pinaagi sa paghatag sa Welcome Remarks ni Mr. Alan Francisco L. Bengua isip Anti-Drug Abuse Council Focal Person nga gisundan sa pagpabati sa ilang mga hamubong mensahe sila si CLGOO Machutes ug Chief Dasmarinas, kabahin sa hugtanon karong kampanya sa atong nasudnong kagamhanan batok sa iligal nga droga.
Mipabati usab sa ilang “Statement of Support” alang sa kampanya sa iligal nga droga ang nagkalain-laing sektor nga gilangkoban sa mga partisipantes, nga gisundan usab dayon sa pagbasa sa “Unity Statement” alang sa kinatibuk-ang suporta gikan sa tanan ngadto sa BIDA Program sa atong kagamhanan.
(Source: Dipolog City Government Facebook page)