General Santos City – Karon pa lang daan sayag o mapahiyumon kaayo ang mga dagway sa tanang mga empleyado sa local government unit (LGU) ning s’yudad sa General Santos.
Kini tungod hingpit nang gi-aprobahan sa espesyal nga sesyon sa Sangguniang Panlungsod (SP) kaganinang buntag (Disyembre 13, 2022) ang Supplemental Budget (SB) alang ilang sa Christmas Bonus ug ubang mga benepisyo nga ginahatag matag-Pasko.
Sumala ni Konsehal Yumang- ang kasamtangang Chairman sa Committee on Finance, Ways & Means and Appropraitions sa Sangguniang Panlungsod ug maoy naningkamot sa pagpangita’g pundo, nga modawat og tag-P115,000 ang matag-usa ka regular, casual ug co-terminos nga empleyado sa LGU-Gensan nga gilangkoban sa tag-P80,000 nga “goodwill bonus, tag-P25,000 nga collective negotiation incentives (CNI) ug tag-10,000 nga gitawag og SRI.
Samtang ang mga JO-Job Order workers modawat sab og tag-P20,000 nga Christmas bonus nga mitaas og P2,000 ikumpara sa mi-aging tuig 2021 nga tag-P18,000 lamang.
Kapin matud pa sa P100 milyones gikan sa savings nga pundo sa LGU-Gensan ang nakagahin nga pundo alang sa nasampit nga katuyo-an.
(Source: LGU-GenSan)
