Dungan nga gidala sa City Government of Dipolog ang feeding program ug libreng tuli aron mas mapalapdan ang serbisyo alang sa mga kabataan ug pamilya sa dakbayan niadtong Mayo 21.
Kapin 250 hangtod 300 ka kabataan ang nakabenepisyo sa Community Outreach Program Feeding Activity nga gipahigayon sa D’ Food Hub and Events Center ubay sa Dipolog Boulevard pinaagi sa City Tourism Office ug City Social Welfare and Development Office (CSWDO).
Gawas sa pagkaon, gihimo usab nga sentro sa kalihokan ang paghatag og pag-atiman ug kalipay sa mga kabataan pinaagi sa pakighiusa sa lokal nga gobyerno ug mga partner stakeholders.
Mipasalig usab si Vice Mayor Senen O. Angeles, nga nirepresentar kang Mayor Roberto Y. Uy, sa padayon nga suporta sa mga programang makatabang sa mga kabos ug nanginahanglan nga pamilya sa siyudad.
Samtang nagpadayon ang outreach activity, gipahigayon usab ang libreng tuli sa Plenary Hall pinaagi sa panagtambayayong sa City Health Office ug City Nutrition Office isip kabahin sa kampanya sa dakbayan alang sa accessible nga health ug social services.
Misuporta usab sa maong kalihokan sila si City Legal Officer Goldie Love P. Gonzales, Assistant CSWDO Jovencia D. Gregory, ug City Councilor Praxides P. Rubia.(IKEN B. GULLEM)
Source: Dipolog City Government