Napabiling malaria-free ang komunidad sa Tituk, Sindangan human negatibo sa malaria ang tanang 45 ka residente nga boluntaryong ni-undergo og testing atol sa surveillance ug monitoring nga gipahigayon sa lokal ug probinsyal nga health workers.
Gipangunahan ni Ma’am Catherine Villarin, HPO I, uban ni Sir Samson Juancho sa Provincial Department of Health Office ug Municipal Malaria Program Coordinator Daisy Aquino ang maong kalihokan isip kabahin sa padayong pagbantay batok sa posibleng pagsulod balik sa sakit.
Sumala sa health team, adunay pipila sa mga gitest nga nakasinati og hilanat apan walay nakit-ang kaso sa malaria. Bisan pa sa pagpadayon sa probinsya sa zero malaria cases sukad 2019, giingong importante gihapon ang regular monitoring, sayong pag-detect, ug aktibong partisipasyon sa komunidad aron mapabiling gawas sa peligro ang mga pamilya.
Gidayeg usab sa health office ang partisipasyon ni Barangay Health Worker Jona Quimol nga trained sa Malaria Rapid Diagnostic Test (RDT), nga padayon sa pagpalig-on sa iyang kahibalo alang sa kampanya kontra malaria.
Mipasalamat usab ang health team sa Titik Barangay Council sa ilang suporta ug pagpakaon sa mga partisipante ug personnel, ingon man kang Sir Marlou nga mitanyag og ilimnon alang sa tanan atol sa kalihokan.(IKEN B. GULLEM)
Source: RHU Sindangan