Gisugdan sa Probinsyal nga pangagamhanan sa Zamboanga del Norte ang mga pagpangandam alang sa pag-upgrade sa Sindangan District Hospital pinaagi sa komprehensibong technical assessment ug ocular inspection aron matino ang mga prayoridad nga pagpaayo sa pasilidad ug serbisyong medikal.
Gipahigayon ang inspeksyon ubos sa direktiba ni Gobernador Darel Dexter T. Uy nga palig-onon ang mga pasilidad panglawas sa lalawigan. Gipangulohan kini ni Zamboanga del Norte Medical Center Hospital Administrator Dr. Esmeralda Nadela ug OIC-Provincial Engineer Engr. Lane John, uban sa ilang mga technical ug engineering personnel.
Gisusi sa grupo ang nagkalain-laing bahin sa ospital lakip ang mga ward sa pasyente, mga hallway, sulod nga layout, suga, accessibility, air conditioning units, mga kagamitang medikal, ingon man ang kisame ug atop aron matino kung unsang mga bahin ang nagkinahanglan og pag-ayo, pag-ilis o modernisasyon.
Matud sa mga opisyal, ang maong assessment maoy unang lakang sa giplanong rehabilitasyon sa Sindangan District Hospital aron mapalambo ang kalidad sa serbisyo ug mapalig-on ang kapasidad niini sa pag-atiman sa mga pasyente, ilabina sa mga residente sa Sindangan ug kasikbit nga mga lungsod.(JENIFFER JR. DELICA)
Source: Zamboanga del Norte Provincial News Network