Gipasundayag sa mga estudyante sa Dipolog Community School ang tradisyonal nga Dragon Dance human nahimong sentro sa kultura ang Provincial Capitol Grounds kaniadtong lunes, Pebrero 16, isip pasiuna sa pagsaulog sa Chinese New Year.
Kini nga pasundayag, giubanan sa kusog nga dinahunog sa tambol, nakadani sa mga empleyado ug bisita sa Kapitolyo nga midungaw aron motan-aw. Ang plaza napuno sa mabulokon nga dekorasyon, nga nagpakita nga andam na ang probinsya sa mas dako ug opisyal nga selebrasyon nga magsugod karong adlawa, Martes.
Sumala sa mga tigpasiugda, ang maong cultural presentation dili lamang kalingawan kundili simbolo usab sa pag-ila ug pagrespeto sa nagkalain-laing kultura nga anaa sa komunidad. Ang Dragon Dance, usa sa pinakailadong bahin sa Chinese New Year, gituohan nga nagdala og swerte ug nagpalayo sa dautang espiritu.
Samtang magpadayon karong adlawa ang mga kalihokan, gilauman nga mas mapalig-on pa ang panaghiusa ug pagsinabtanay sa katawhan pinaagi sa pag-apresyar sa tradisyon nga naghiusa sa nagkalain-laing sektor sa probinsya.(IKEN B. GULLEM)
Source: Zamboanga del Norte Provincial News Network