Gipuno sa kusog nga tunog sa tambol ug makapasilaw nga kolor sa mga costume ang palibot sa Waterfront Cebu City Hotel & Casino niadtong Lunes sa gabii atol sa pagsaulog sa Lunar New Year.
Nakig-uban si Gob. Pamela Baricuatro sa komunidad sa pag abi-abi sa Year of the Horse. Ang selebrasyon gipasiugda sa lion dance ug dragon dance nga nakahatag og dugang kasadya sa maong kalihokan.
Nagtapok usab ang mga lokal nga lider ug mga residente, nga nag-usa sa pag-ampo alang sa mauswagon ug malinawon nga bag-ong tuig sa mga Chinese. Gitapos ang selebrasyon pinaagi sa makabungog nga fireworks display nga nakapadugang sa kahinam sa tanan.
Mitambong usab si Mayor Cebu City Nestor Archival, nga nagpakita sa panaghiusa sa mga lider sa probinsya ug siyudad sa pagsuporta sa kultura ug tradisyon.
Matod sa mga opisyal, ang kalihokan usa ka pahinumdom nga ang kalipay ug kalamboan mas nindot kung dungan nga gisaulog sa komunidad.
Source: Cebu Province PIO
I via Renante Socia Lada