BALIGUIAN, Zamboanga del Norte — 69 ka hatchlings nga critically endangered Hawksbill turtle ang malampusong gibuhian sa dagat niadtong niadtong nilabay nga adlaw sa Barangay Mamad, Baliguian.
Sumala sa Community Environment and Natural Resources Office (CENRO) Siocon, nasunod ang release human makadawat og report gikan sa mga residente bahin sa presensya sa mga bag-ong pusa nga pawikan sa maong lugar. Gilayon kining gisusi sa Conservation and Development Section ug gihimo ang pagbuhi subay sa wildlife handling protocols.
Gipahigayon ang kalihokan uban sa koordinasyon ni Barangay Councilor Elsa Amper ug sa suporta sa mga miyembro sa komunidad, nga nagpakita sa aktibong partisipasyon sa lokal nga katawhan sa pagpanalipod sa kinaiyahan.
Ang Hawksbill turtle (Eretmochelys imbricata) nakalista isip Critically Endangered ubos sa DENR Administrative Order No. 2019-09 ug giila usab sa International Union for Conservation of Nature (IUCN). Padayon kining giatubang ang hulga sa habitat loss ug illegal trade. Giawhag sa DENR ang publiko nga magreport sa mga nesting activity ug likayan ang pagdisturbo sa mga nesting sites aron mapalig-on ang coastal ug wildlife protection.(JENIFFER JR. DELICA)
Source: DENR Zamboanga Peninsula