Matud pa sa kampo ni Gov. Nene Jalosjos mas daghan pa unta ug mahimo si Gov. Rosalina “Nene” Jalosjos sa probinsya kung dili mo babag ang mga board members sa Sangguniang Panlalawigan nga dili nila kaalyado kini ang nahimong reaksyon sa kampo sa Jalosjos human sila gibatikos ni Sindangan mayor Rosendo “Dodoy” Labadlabad bag-ohay lang nga matod pa walay nahimo nga proyekto ang Gobernadora.
Kahibaloan nga sa paglingkod sa gobernadora sa kapitolyo, gipangkuhaan kini sa kanhi Gov. Berto Uy ug sa mga kaalyadong board members niini tungod kay ilang gi aprubahan ug gi donar ang mga ekipo apil na ang gamit sa ospital ngadto sa mga kaalyadong mayor nga maoy hinungdan nag atubang sila karon ug asunto sa ombudsman.
Matud pa sa kampo sa Jalosjos dili matod pa makadawat ang kanhi gobernador nga gipildi sila sa nakalabayng eleksyon nga sa ilang pagtuo wala nay kahigayunan nga maangkon ni Gov. Nene ang maong posisyon, pero ang mga katawhan na ang me disisyon nga si Gov. Nene ang ibutang isip inahan ning Probinsya.
Hinungdan sa mga kaguliyang napakgang ang mga plano nga kaayuhan ug kalambuan sa probinsya, diin walay magamit nga ekipo para mapatuman ug dali ang mga proyekto.
Sa laing bahin gikuhaan usab ug gamit ang ZNMC nga maoy rason naglisod ang gobernadora para mapatigayon ang mga pasyente sa maong tambalanan.
Matud pa sa kampo sa Jalosjos nga dili usab sila makahimo nga mo loan para sa mga proyekto sanglit babagan kini sa mayorya sa SP nga dili nila kauban ug nag duda sila nga may mga nagpaluyo niini.
Sa pagkakaron daghang giatubang nga problema ang kagamhanang probinsyal nga hantud karon sa kanunay gipangitaan pag mga sulusyon ug magpadayon kini hangtod dili magkasinabot ang SP ug ang gobernador nga ang mismong maapektuhan ang katawhan sa probinsya tungod lamang sa politikanhong panagbangi. (Angelica T. Obina)
(Source: Banat Mindanao)