Naka-angkon og daghang samad ang usa ka 57-anyos nga babaye human kini gitigbas ug gidunggab sa iyang kaugalingong igsoon sa Barangay Simborio, Pamplona, Negros Oriental, niadtong, Pebrero 16, 2025.
Base sa imbestigasyon nga gipangulohan ni PSMS Alner Rodriguez, ang biktima nga si Sally Bual, dalaga, ug residente sa maong lugar, nagbarog sa atubangan sa ilang balay sa alas 6:30 sa gabii dihang kalit lang kini giatake sa iyang igsoon nga si Milly Bual. Wala pa matino ang hinungdan sa insidente, apan nasayran nga adunay personal nga panagbangi ang duha.
Dali nga gidala ang biktima sa Urgent Care Clinic aron matambalan, samtang daling nisibat ang suspetsado human sa panghitabo.
Sa crime scene, nakit-an ang usa ka sundang nga may gitas-on nga 21 pulgada, nga gigamit sa pagpangdunggab. Padayon ang hot pursuit operation sa kapulisan aron madakpan ang suspetsado. (Renante Socia Lada)