Gitigom sa Provincial Anti-Drug Abuse Council (PADAC) ang mga mayor, lokal nga Anti-Drug Abuse Councils (ADACs), ug mga representante sa nagkalain-laing ahensya sa gobyerno alang sa regular nga panagtigom nga gipahigayon niadtong milabay nga adlaw sa Provincial Capitol sa Dipolog City.
Tumong sa maong miting ang pagpalig-on sa koordinasyon ug paghiusa sa mga paningkamot sa 25 ka lungsod ug duha ka siyudad sa Zamboanga del Norte aron mas epektibong masulbad ug mapugngan ang mga kaso nga may kalabotan sa ilegal nga droga pinaagi sa paghisgot sa mga kalampusan, hagit, ug mga panginahanglan sa matag lokalidad.
Atol sa panagtigom, gipaila ang Mayors’ VOICE program isip plataporma sa pagpaambit sa lokal nga mga kasinatian ug epektibong pamaagi nga mahimong sundon sa ubang mga lokal nga panggamhanan. Sa 2026 ADAC Performance Audit, nakab-ot sa mga lungsod sa Kalawit, Roxas ug Rizal ang hingpit nga 100 puntos.
Giaprobahan usab sa konseho ang “Oplan Kuyog Ta,” usa ka 14 ka adlaw nga kampanya nga gisugyot ni Zamboanga del Norte Police Provincial Office Director PCol. Reydante Ariza aron mapalig-on ang partisipasyon sa komunidad, mapakusgan ang anti-criminality measures, ug mapasiugda ang malinawon ug drug-free nga mga barangay.
Gipaambit usab ni TESDA Provincial Director Engr. Adrian B. Ampong ang mga programa sa ahensya nga maghatag og skills training ug National Certificates (NC I hangtod NC IV) alang sa Persons Who Use Drugs (PWUDs) isip kabahin sa ilang rehabilitasyon ug reintegrasyon sa komunidad.(IKEN GULLEM)
Source: Zamboanga del Norte Provincial News Network