Alang sa pagtukod sa SSS E-Center sa lungsod, pormal nga mipirma sa Memorandum of Agreement (MOA) ang Local Government Unit (LGU) sa Gutalac ug ang Social Security System (SSS) aron mapaduol ang mga serbisyo sa ahensya ngadto sa mga Gutalacnon.
Gipangunahan ni Municipal Mayor Eddie Justin Quimbo ang pagpirma sa kasabutan isip kabahin sa paningkamot sa lokal nga panggamhanan sa pagpalapad sa akses sa mga batakang serbisyo sa gobyerno.
Pinaagi sa SSS E-Center, mas sayon ug mas paspas na nga maka-avail ang mga residente sa nagkalain-laing programa ug online services sa SSS, nga dili na kinahanglan mobiyahe ngadto sa ubang lungsod aron makatransaksyon.
Ang maong panagtambayayong gilauman nga makapauswag sa paghatag og episyente, accessible ug responsive nga serbisyo publiko alang sa mga Gutalacnon.
Nagpasalamat usab ang LGU Gutalac sa SSS alang sa maong partnership nga gilauman makahatag og mas sayon nga pag-angkon sa mga serbisyo ug dugang oportunidad sa katawhan.(IKEN B. GULLEM)
Source: LGU GUTALAC-PUBLIC INFORMATION