Gipahigayon sa Philippine Statistics Authority (PSA) Zamboanga del Norte Field Office ang ikatulong lebel sa pagbansay alang sa Hulyo 2026 Labor Force Survey (LFS) ug 2026 Annual Poverty Indicators Survey (APIS) niadtong Hunyo 22 hangtod 26 sa A4M Building, Barangay Miputak, Dakbayan sa Dipolog.
Ang maong lima ka adlaw nga pagbansay nagtumong sa pag-andam sa pito ka Statistical Researchers ug duha ka Team Supervisors pinaagi sa pagpalalom sa ilang kahibalo sa mga pamaagi sa pagdumala sa survey, pagkuha sa husto nga datos, ug pagsunod sa mga giya sa PSA aron masiguro ang kalidad sa impormasyon nga makolekta.
Atol sa pagbansay, gipangunahan nila Statistical Analyst Lanibel A. Pamatong, Provincial Focal Person, ug Assistant Statistician Moriancumer A. Cabasag ang mga sesyon nga nagtuki sa husto nga pagpatuman sa duha ka nasudnong survey.
Ang Labor Force Survey maoy nagkolekta og datos bahin sa kahimtang sa labor force ug empleyo sa nasud, samtang ang Annual Poverty Indicators Survey nagsukod sa mga timailhan sa kakabus sa mga panimalay. Ang resulta sa duha ka survey gamiton sa pagplano sa mga polisiya ug programa sa gobyerno, lakip ang pagsubay sa Sustainable Development Goals (SDGs).
Giawhag usab sa PSA ang tanang napiling respondents sa paghatag og tinuod ug husto nga impormasyon aron mapalig-on ang kasaligan sa mga datos nga mahimong basihan sa pagpalambo sa mga programa ug serbisyo sa gobyerno.(IKEN GULLEM)
Source: PSA Zamboanga del Norte