Gibutyag ni 1st District Congressman Roberto “Pinpin” Uy Jr. ang kapin P800 milyones nga mga proyekto alang sa Dakbayan sa Dapitan atol sa pagsaulog sa ika-63 Charter Day niadtong Hunyo 22.
Sumala sa kongresista, ang pondo pagagamiton sa nagkalain-laing proyekto sa imprastraktura ug serbisyong publiko isip tubag sa mga panginahanglan ug mga hangyo sa mga Dapitanon. Lakip niini ang road concreting projects, water system project gikan sa Barangay Opao padulong sa sentro sa siyudad, ug mga dalan nga magdugtong sa nagkalain-laing barangay.
Giapilan usab sa pondo ang pagtukod sa usa ka 4-storey Justice Hall nga magamit sa mga national government agencies nga wala pa’y kaugalingong opisina sa siyudad.
Gilauman nga sugdan ang implementasyon sa mga proyekto sa ika-upat nga quarter ning tuiga ug magpadayon hangtod sa 2027, diin gipadayag usab nga kapin 70 ka road concreting projects ang naaprubahan alang sa unang distrito sa maong tuig.(JENIFFER JR. DELICA)
Source: Dapitan City Government