Gipalig-on sa City Disaster Risk Reduction and Management Council o CDRRMC sa Dipolog City ang kahandam batok sa mga kalamidad atol sa ilang ikaduhang quarter meeting nga gihimo sa Museo Dipolog niadtong Hunyo 23.
Gipangulohan ni CDRRM Officer Ryne Bustillo ang maong tigom nga gitambongan ni City Administrator Atty. Valerie Hope Jauculan-Flores, mga miyembro sa konseho ug mga representante sa nagkalain-laing ahensya sa gobyerno ug partner institutions.
Gihisgutan sa miting ang pinakabag-ong weather updates gikan sa PAGASA ug mga lakang aron mapalig-on pa ang koordinasyon sa mga ahensya, emergency preparedness ug disaster response sa siyudad.
Gikumpirma usab sa mga partisipante ang ilang padayon nga paningkamot sa pagpanalipod sa kinabuhi ug kaayohan sa mga Dipolognon batok sa posibleng natural ug hinimog-tawo nga mga kalamidad.(JENIFFER JR. DELICA)
Source: Dipolog City Government