Gihimo na sa Department of Agrarian Reform o DAR ang katapusang inspeksyon ug beripikasyon alang sa P30-milyong Serongan–Pangandao Farm-to-Market Road Project sa lungsod sa Manukan, nga nagpasabot nga andam na kini alang sa implementasyon.
Ang proyekto maglangkob sa mga barangay Serongan ug Pangandao ug gitumong sa pagpalig-on sa transportasyon sa mga produktong agrikultural gikan sa uma ngadto sa merkado.
Sumala sa DAR, gilauman nga moubos ang gasto sa transportasyon ug mas mapaspas ang pagdala sa mga ani ngadto sa mga merkado, nga makatabang sa pagdugang sa kita sa mga mag-uuma ug pagpalambo sa lokal nga ekonomiya.
Gipasiugda usab sa ahensya nga ang proyekto resulta sa panagtambayayong sa nasyonal, probinsyal ug lokal nga panggobyerno aron maseguro ang hapsay nga implementasyon ug mas daghang oportunidad alang sa mga komunidad sa kabanikanhan sa Zamboanga del Norte.(JENIFFER JR. DELICA)
Source: DAR Zamboanga del Norte Province