Nadakpan sa buy-bust operation ang usa ka lalaki human makuhaan og gidudahang shabu nga nagkantidad og ₱17,000.00 pesos sa Purok Centro, Barangay Oro, ning siyudad niadtong Hulyo 7, 2025.
Ang nadakpan naila na si Kennith Bajamunde Tumapon, 31-anyos nga lalaki, usa ka karpintero ug residente sa Purok Bulaklak, Barangay Ma. Cristina, Dapitan City.
Gidumala ang operasyon sa mga personahe sa Dapitan City Police Station (CPS) pinangulohan ni PLT Mariannie D. Mandi, uban ang ZN MARPSTA, ug Mabuhay SBC 5th SOU MG.
Nakuha gikan sa suspek ang tulo ka sachet sa gidudahang shabu nga adunay kinatibuk-ang gibug-aton nga 2.5 gramos, usa ka Php 500.00 pesos bill nga buy-bust money, usa ka orange nga lighter, ug usa ka empty pack sa Winston nga sigarilyo.
Ang operasyon dokumentado ug gitambongan sa DOJ representative, media representative, ug barangay official.
Ang suspetsado anaa na karon sa kustodiya sa Dapitan City Police Station, samtang andam na ang kasong ipasaka batok kaniya. Ang mga ebidensya ipaubos sa ZN Provincial Forensic Unit-9 alang sa chemical examination.(Jumalisa Papa)
Source: Dipolog CPS