Gilusad sa Philippine Drug Enforcement Agency(PDEA), inubanan sa nagkalain-laing ahensiya sa probinsya, ang tinuig nga OPLAN:HARABAS sa Integrated Bus Terminal, Miputak, Dipolog City kaganiha, Oktubre 30, 2025, arun maghatag og Public Safety sa kadalanan pinaagi sa pag drug test sa mga drayber nga nagdala og mga pampasaherong sakyanan sama sa bus, motorcab, og bao2x.
Ang maong kalihukan malampusong napahigayon inubanan sa suporta sa Dipolog City Government, Province of Zamboanga del Norte, Land Transportation Office, Department of Transportation, Philippine National Police, og Land Transportation Franchising and Regulatory Board.
Pinaagi sa maong programa, nagmalaumon si Agent IV Ariel Escudero, Provincial Officer PDEA ZN, og Agent Ritchie Sorronda, Assistant Provincial Officer, nga mahilayo ang mga drayber sa ginadiling droga para sa mas hapsay nga pagmaneho sa kadalanan.
“Ang druga stimulant man gud ni siya, makapa agresibo ni sa ilaa[drivers], ” matud pa ni Agent Escudero.
Gipun-an usab ni Agent Escudero ang iyang salaysay nga ang mga mag positibo sa maong test, mga biktima lamang umano sa ginadiling tambal, og angay nga ipasailalom sa intervention program og i hold ang mga lisensya sa LTO.
Ang nahisgutan nga test dili lamang limitado sa mga drayber apan lakip usab ang mga konduktor sa nagkalain-laing bus. Nakigtambayayong usab ang maong programa sa Undas 2025 “Assistance Desk” sa DOTr-LTO Oplan Biyaheng Ayos.(JENIFFER JR. DELICA)