Pinaagi sa hiniusang operasyon sa nagkadaiyang ahensya sa gobyerno ubos sa Oplan Harabas, gipahigayon ang drug testing sa mga drayber sa pampublikong sakyanan sa Integrated Bus Terminal sa Brgy. Miputak sayo sa buntag kaniadtong Marson 31, 2026 aron malikayan ang disgrasya sa dalan.
Gipangulohan sa Philippine Drug Enforcement Agency (PDEA) ang kalihokan uban sa koordinasyon sa LTO, LTFRB, DOTr ug PNP, ilabi na sa pagsugod sa Semana Santa ug tingbakasyon diin mosaka ang gidaghanon sa mga biyahero.
Gipailalom sa drug testing ang mga drayber sa bus, jeepney, van, motorcab ug habal-habal gamit ang gatusan ka urine test kits nga gisuportahan sa Probinsyal nga Pangagamhanan ubos sa liderato ni Governor Darel Dexter T. Uy.
Sumala sa PDEA, ang Oplan Harabas nagtumong sa pagpugong sa pagmamaneho ubos sa impluwensya sa ilegal nga droga ug pagpanalipod sa publiko batok sa aksidente sa kadalanan.
Kung ang driver magpositibo kuhaan kini og lisensya sa LTO ug ipailalom sa intervention program sa PDEA pinaagi sa barangay drug clearing program.
Kini nga operasyon kabahin sa padayon ug regular nga implementasyon sa Oplan Harabas sa tibuok nasud aron mapalig-on ang kampanya batok sa ilegal nga droga ug mapataas ang kaluwasan sa dalan.(IKEN B.GULLEM)
Source: Zamboanga del Norte Provincial News Network