Sa nagpadayon nga hulga sa pagkawala sa mga pawikan tungod sa illegal nga pangisda, polusyon, ug pagkadaot sa ilang pinuy-anan, mas gipakusgan sa lokal nga gobyerno sa Dapitan ang ilang aksyon aron mapanalipdan ang maong marine species.
Tungod niini, naglunsad ang Dapitan Local Government Unit uban ang Department of Environment and Natural Resources (DENR) og usa ka espesyal nga hands-on training alang sa marine turtle conservation sa City Environment Center Amphitheater.
Gitumong sa maong pagbansay ang paghatag og kahibalo ug praktikal nga kahanas sa mga partisipante aron mahimo silang “first responders” sa matag sighting sa pawikan ug sa pagpanalipod sa ilang nesting sites.
Gihatagan usab og lawom nga diskusyon ang mga partisipante gikan sa mga eksperto sa CENRO Piñan ug Manukan, lakip ang pagpresentar sa kasamtangang datos sa pawikan sa siyudad ug ang pagpasabot sa Republic Act 9147 o Wildlife Resources Conservation and Protection Act.
Samtang nagtan-aw sa dugayng plano, gipadayag sa City Legal Office nga nagpadayon ang paghulma sa mga ordinansa sama sa Pawikan Conservation Ordinance, Tarsier Conservation Ordinance, ug ang city-wide greenbelt zone uban sa pakigtambayayong sa Andres Bonifacio School of Law – Green Legal Clinic.
Natapos ang kalihokan pinaagi sa field demonstration sa Sunset Boulevard, diin aktwal nga gipakita ang hustong proseso sa pagbalhin sa itlog sa pawikan ug pag-atiman niini.(IKEN B. GULLEM)
Source: City Government of Dapitan