Naghiusa ang kapulisan ug mga kawani sa agrikultura sa pagpangani og mga utanon sa camp garden isip kabahin sa inisyatiba sa pagpalig-on sa seguridad sa pagkaon ug pagtabang sa komunidad, kaniadtong Marso 30, 2026.
Gipangulohan sa Zamboanga del Norte 2nd Provincial Mobile Force Company ubos sa superbisyon ni PLTCOL Edwin D. Verzon ang kalihokan uban sa pakigtambayayong sa Provincial Agriculture Satellite Office sa Fatima, Liloy.
Ang mga ani nga utanon gipang-apod-apod sa mga partisipante aron madala sa ilang panimalay, nga makatabang sa panginahanglanon sa ilang pamilya ilabi na sa panahon sa kalisod sa ekonomiya.
Matud pa, ang maong inisyatiba dili lamang bahin sa pagpangani kundili usa usab ka paagi sa pagpakita sa panaghiusa ug pag-atiman sa usag usa.
Gilauman nga pinaagi sa maong kalihokan, mapalambo pa ang kooperasyon tali sa kapulisan ug komunidad samtang naghatag og konkretong suporta sa panginabuhian ug nutrisyon.(IKEN B. GULLEM)
Source: Zamboanga del Norte 2nd PMFC