Mikabat sa 900 ka mangrove seedlings ang gitanom sa Provincial Government of Zamboanga del Norte aron mapalig-on ang natural nga proteksyon sa mga komunidad batok sa baha, pagsaka sa tubig, ug pagkadaot sa yuta.
Gipahigayon ang Mangrove Planting ug Coastal Clean-Up Activity sa Barangay Piao ug Barangay Langatian ning Setyembre 1, diin 700 ka Rhizophora ug 200 ka Api-api ang gitanom sa daplin sa suba.
Kabahin kini sa mga inisyatibo sa probinsya sa pagpalig-on sa environmental protection ug disaster preparedness, ilabina sa mga komunidad nga duol sa mga suba ug baybayon.
Matud ni 2nd District Board Member Dante Bagarinao, nga representante ni Governor Darel Dexter T. Uy, importante nga ipadayon sa mga barangay ang pagpananom ug pag-atiman sa mga mangrove aron mahimong malungtarong panagang sa komunidad batok sa mga peligro nga dala sa baha ug uban pang kalamidad.
Nagpasalamat usab sila Barangay Piao Captain Librado T. Magcanta Jr. ug Barangay Langatian Captain Isagani G. Binondo sa Provincial Government sa pagpili sa ilang mga barangay isip venue sa maong programa.
Aktibong miapil sa kalihokan ang mga magtutungha sa Jose Rizal Memorial State University (JRMSU), SEA-OIL Philippines, mga barangay officials, mga miyembro sa 4Ps, Erpat, ug uban pang stakeholders.
Gipangulohan ang kalihokan sa Office of the Provincial Environment and Natural Resources Officer (OPENRO/PEMO) ubos sa pagdumala ni OIC-PEMO Engr. Alfonso Gorre Jr., sa pakigtambayayong sa Office of the Provincial Disaster Risk Reduction and Management Officer (OPDRRMO) nga gipangulohan ni OIC-PDRRMO Atty. Arvin L. Bonbon.
Niapil usab sa inisyatiba ang Office of the Provincial Social Welfare and Development Officer (OPSWDO) ubos sa pagdumala ni OIC-OPSWDO Hannah Lou G. Mandantes ug ang mga kawani sa MDRRMO-Roxas.
Pinaagi sa pagpananom ug pagpanalipod sa mangrove areas, gipalig-on sa Provincial Government ang paningkamot sa pagpreserbar sa kinaiyahan samtang nag-andam sa mga komunidad batok sa epekto sa mga katalagman.(IKEN B. GULLEM)
Source: Zamboanga del Norte Provincial News Network